Për partinë Fjala, rrahja në mes deputetëve në debatin e sotëm, konkretisht sulmi i deputetit të Vetëvendosjes, Frashër Krasniqit ndaj deputetit të Nisma-s Milaim Zeka, “tregon qartë metodologjinë e dhunës që ekziston brenda VV-së”.

“Ky sulm duhet të ndezë alarmin shtetëror dhe të ngritë masat e parandaluese për të ardhmen. Ngase nga ajo që kemi parë deri më tani duke filluar nga dhuna në rrugë, dhunimi i policëve, sulmet ndaj institucioneve shtetërore, dëmtimi i pronës publike dhe rrahja e sotme në debat televiziv, tregon qartë se kjo lëvizje është e gatshme të përdorë çdo formë të dhunës vetëm e vetëm për të arritur në pushtet”, thuhet në reagimin e Partisë Fjala.

“Institucionet tona të drejtësisë dhe sigurisë duhet të jenë më aktive dhe më efikase në parandalimin e sulmeve të tilla që mund të sjellin edhe viktima në të ardhmen. Turp dhe tmerr i madh është duke ndodhur në vendin tonë. Po njollosemi edhe si popull edhe si shtet”, thuhet më tej në reagim.